Qarabağda məşğulluq səviyyəsi 92%-i ötüb – Agentlik sədri

Qarabağ bölgəsində məşğul əhalinin səviyyəsi hazırda 92%-dən yuxarıdır. Bunu jurnalistlərə açıqlamasında Dövlət Məşğulluq Agentliyinin İdarə Heyətinin sədri Sadiq Əliyev bildirib.

Əliyevin sözlərinə görə, bölgəyə qayıdış prosesi ilə paralel olaraq əhalinin peşə hazırlığına və özünüməşğulluq proqramlarına cəlb edilməsi mərhələli şəkildə həyata keçirilir. 

O qeyd edib ki, bu tədbirlər məşğulluq səviyyəsinin yüksək qalmasına imkan verir.

 2025-ci il üçün Qarabağa 40 min nəfərin köçürülməsi nəzərdə tutulub, 2026-cı il Böyük Qayıdış Proqramı çərçivəsində isə ümumilikdə 130 min nəfərin bölgəyə qaytarılması planlaşdırılır.

Azərbaycan işğaldan azad edilmiş ərazilərdə şəhərsalma, infrastruktur və iqtisadi fəaliyyətin bərpası ilə paralel məşğulluq mexanizmlərini genişləndirir. Bölgədə “ağıllı kənd” və “ağıllı şəhər” modelinə uyğun istehsal, xidmət və kənd təsərrüfatı sahələrinin qurulması iş yerlərinin artımını sürətləndirən əsas faktor kimi göstərilir.

Gülnar Nazimqızı