WEF 2030-cu ilə qədər sürətlə yox olacaq peşələri açıqlayıb

Dünya İqtisadi Forumu (WEF) 2030-cu ilə qədər ən sürətlə artan və ən tez itən peşələrlə bağlı yeni proqnoz açıqlayıb. Hesabat Bakıda keçirilən "Gələcəyin Peşələri Sammiti" forumunda təqdim olunub.

Təşkilatın “Future of Jobs Report 2025” hesabatına əsasən, süni intellektvə yaşıl texnologiyalar üzrə ixtisaslar əmək bazarının əsas inkişaf istiqamətləri olacaq.

Sürətlə artan peşələrin siyahısına böyük verilənlər mütəxəssisləri(big data), fintex mühəndisləri, Aİ və maşın öyrənməsi üzrə mütəxəssislər, təhlükəsizlik və proqram təminatı üzrə mütəxəssislər, eləcə də avtonom və elektrik nəqliyyat vasitələri üzrə mütəxəssislər daxildir. 

WEF bildirir ki, bu sahələrdə tələbatın kəskin artmasına rəqəmsallaşma, avtomatlaşdırma və yaşıl keçid səbəb olur.

Hesabata görə, ən sürətlə yox olacaq ixtisaslar isə əsasən əl əməyinə və təkrarlanan işlərə əsaslanan sahələrdir. Poçt xidməti əməkdaşları, bank kassirləri, məlumat daxil edən işçilər, bilet satıcıları, dəftərxana və administrativ katiblər ən çox risk altında olan peşələr kimi göstərilib.
WEF qeyd edir ki, rəqəmsal transformasiya fonunda işçi qüvvəsinin yenidən ixtisaslaşması və bacarıqların modernləşdirilməsi ölkələrin rəqabət qabiliyyəti üçün həlledici əhəmiyyət daşıyır. Təşkilat əlavə edir ki, avtomatlaşdırma bəzi iş yerlərini azaltsa da, yüksək bacarıqlı yeni peşələr üçün geniş imkanlar yaradacaq.

Gülnar Nazimqızı