Ağcabədidə pambıq yığımı ötən ilə nisbətən məhsuldarlıq 17% yüksəlib

Azərbaycanın əsas pambıqçılıq rayonlarından olan Ağcabədidə fermerlər məhsul yığımını davam etdirir və bu günədək 39 139 ton pambıq toplanıb. Bu barədə rayonun Dövlət Aqrar İnkişaf Mərkəzinin (DAİM) bitkiçilik sektorunun baş mütəxəssisi Ramiz Quluzadə məlumat verib.

Rəsmi göstəricilərə görə, hazırkı mövsümdə orta məhsuldarlıq 33,11 sentner təşkil edir ki, bu da ötən ilin analoji dövrü ilə müqayisədə təxminən 17% çoxdur. 2024-cü ildə rayonda 37 277 ton məhsul yığılmış, orta məhsuldarlıq 28,4 sentner olmuşdu.

Bu il Ağcabədidə “Azərpambıq”, “Prime Cotton”, “P-Aqro”, “Hüseyn Pambıq İK”, “Azərşəkər” və “Cotton Trade” MMC-lərlə müqavilələr əsasında 11 821 hektar sahədə pambıq becərilib. Quluzadənin sözlərinə görə, düzgün aqrotexniki tədbirlərin – kultivasiya, seyrəltmə, gübrələmə, suvarma və zərərvericilərə qarşı dərmanlamanın – vaxtında aparılması məhsuldarlığın artmasına şərait yaradıb.

DAİM sahələrdə yığımın itkisiz aparılması üçün nəzarətin gücləndirildiyini, rayon rəhbərliyi və aidiyyəti qurumların mütəmadi monitorinqlər həyata keçirdiyini bildirib.