Reklam pulları xaricə axır, yerli media zəifləyir –Deputatdan xəbərdarlıq /Video

Deputat Elçin Mirzəbəyli yerli televiziya və radio sektorunun reklam bazarında payının sürətlə azalması ilə bağlı xəbərdarlıq edərək, böyük xarici rəqəmsal platformaların – o cümlədən TikTok, Meta və Google-un – bazarı “faktiki olaraq ələ keçirdiyini” bildirib.

Mirzəbəyli deyib ki, reklam büdcələrinin əhəmiyyətli hissəsi xaricə yönəldiyi üçün yerli TV və radioların gəlirləri azalır, xərclər isə artmaqda davam edir.

Deputatın sözlərinə görə, hazırkı vəziyyət “ədalətli rəqabət” prinsiplərinə uyğun deyil və yaxın illərdə media qurumlarının maliyyə dayanıqlığının daha da zəifləməsinə səbəb ola bilər.

O qeyd edib ki, xarici platformalar Azərbaycanda vergi ödəmir, yerli lisenziya almır və işçi çalışdırmır, lakin reklam gəlirlərinin böyük hissəsinə sahib olur.

“Hər il milyonlarla dollar ölkədən çıxır,” — Mirzəbəyli bildirib.

Deputat bu sahədə beynəlxalq təcrübəni nümunə göstərərək, Avstraliya, Fransa, Türkiyə və Cənubi Koreyada yerli medianın müxtəlif mexanizmlərlə qorunduğunu xatırladıb. Onun sözlərinə görə, Azərbaycan da analoji addımlar atmalıdır.

Mirzəbəyli dövlət qurumlarının reklam büdcələrinin müəyyən hissəsinin yerli mediaya yönəldilməsini, TV və radiolar üçün vergi və rüsum güzəştlərinin nəzərdən keçirilməsini təklif edib. O həmçinin rəqəmsal platformalara vergi tətbiqi, ölkədə nümayəndəlik açmaq öhdəliyi və uşaq-kontent qaydalarına riayət tələbinin vacibliyini vurğulayıb.

Deputat bildirib ki, bu addımlar həm reklam bazarının tənzimlənməsinə, həm də ölkənin informasiya təhlükəsizliyinin gücləndirilməsinə töhfə verə bilər

Gülnar Nazimqızı