Nazir: Gələn ildən dağlıq zonalarda olan şəhid ailələri üçün ev verilməsinə xüsusi yanaşma tətbiq ediləcək

Əmək və Əhalinin Sosial Müdafiəsi Nazirliyi şəhid ailələrinin mənzil təminatı ilə bağlı iki proqramın icrasını davam etdirir və bu məqsədlə kifayət qədər maliyyə resursu mövcuddur. Bunu nazir Anar Əliyev parlamentdə çıxışı zamanı bildirib.

Nazirin sözlərinə görə, indiyədək şəhid ailələrinə 10 min mənzil verilib. Cari il ərzində əlavə 400 mənzilin alınması planlaşdırılır. Mənzil alışı əsasən çoxmənzilli binalar üzrə həyata keçirilir.

Əliyev deyib ki, dağlıq və ətək zonalarda növbədə olan şəxslərin mənzillə təmin edilməsi üçün xüsusi yanaşma tətbiq olunacaq və proses mərhələli şəkildə davam etdiriləcək.

Bundan əvvəl deputat Vasif Qafarov Milli Məclisdə çıxışı zamanı bildirib ki, Əmək və Əhalinin Sosial Müdafiəsi Nazirliyi həssas təbəqədən olan vətəndaşlar üçün fərdi ev və ya çoxmənzilli bina tikmək işini dayandırıb. Nazirlik bu məqsədlə yalnız hazır evlərin satın alınmasını həyata keçirir. 

Gülnar Nazimqızı