Xankəndidə xuliqanlıq edən məmur məhkəmə tərəfindən cəzalandırılıb

Xankəndi şəhərində qadının evinə qanunsuz daxil olaraq xuliqanlıq hərəkətləri etmiş məmur 3 il 6 ay azadlığın məhdudlaşdırılması cəzasına məhkum edilib. “Qafqazinfo”nun məlumatına görə, hadisə bu ilin 24 iyununda baş verib.

Hadisəni törədən Tural İmanov (26 yaş) “Xankəndidə, Ağdərə və Xocalı rayonlarında Bərpa, Tikinti və İdarəetmə Xidməti”nin Mənzil fondunun idarə edilməsi və məskunlaşma departamentinin Xankəndi şöbəsinin aparıcı məsləhətçisi olub. İmanov və iş yoldaşı sərxoş halda gecə saat 01 radələrində Fidan Quliyevanın mənzilinə daxil olub, burada dava-dalaş zamanı bir nəfərin barmağını sındırıblar və qadına xəsarət yetirilib.

Xankəndi Şəhər Məhkəməsinin qərarına əsasən, İmanov cəza müddəti ərzində yaşayış yerini hər gün saat 22:00-dan 06:00-dək tərk etməməli, elektron nəzarət vasitəsi daşımalı və Bakı şəhərinin inzibati sərhədini tərk etməməlidir.