Azərbaycan əmək, məşğulluq sahəsində rəqəmsallaşma və bacarıqların artırılmasına fokuslanır - Anar Əliyev

İqlim dəyişiklikləri, yeni texnologiyalar və süni intellekt əmək bazarında yeni bacarıqların inkişafını, “yaşıl” iş yerlərinin yaradılmasını və sosial dəstək proqramlarının genişləndirilməsini tələb edir. Bunu  əmək və əhalinin sosial müdafiəsi naziri Anar Əliyev Bakıda keçirilən Türk Dövlətləri Təşkilatının (TDT) əmək, məşğulluq və sosial müdafiə nazirlərinin birinci iclasında deyib.

Nazir qeyd edib ki, 2018-ci ildən ölkədə məşğulluq xidmətlərinin yeni modeli tətbiq olunur.

2030-cu ilə kimi Məşğulluq Strategiyası qəbul edilib, “Məşğulluq haqqında” və “İşsizlikdən sığorta haqqında” qanunlar qəbul edilib, İşsizlikdən sığorta fondu yaradılıb.

Yaradılmış mexanizmlər çərçivəsində aktiv məşğulluq tədbirləri genişləndirilib, işsizlərin sosial müdafiəsi gücləndirilib, işəgötürənlərlə əlaqələr artırılıb və ölkə üzrə vahid elektron vakansiya bankı qurulub. Özünüməşğulluq, əmək haqlarının birgə maliyyələşdirilməsi, kvota üzrə iş yerləri və digər məqsədli proqramlar aktiv şəkildə icra olunur.

Peşə hazırlığı proqramları təkmilləşdirilib, özəl sektorda fəaliyyət göstərən mərkəzlər də prosesə cəlb olunub. Məktəblilərə və tələbələrə gələcək əmək bazarına hazırlıq və peşəyönümü xidmətləri göstərilir.

Rəqəmsallaşmaya diqqət çəkən nazir bildirib ki, Nazirliyin təqdim etdiyi 149 xidmətin 90%-dən çoxu artıq elektronlaşdırılıb, 50-dən çoxu isə proaktivdir. Cari ildə pensiya təyinatlarının 94%-i avtomatlaşdırılmış sistemlə həyata keçirilib.

Azərbaycan eyni zamanda əlilliyi olan şəxslərin aktiv həyat tərzinə qoşulması, ictimai-sosial proseslərdə bərabər iştirak imkanlarının genişləndirilməsi və yaradıcılıq potensialının reallaşdırılması üçün ardıcıl tədbirlər həyata keçirir.

Gülnar Nazimqızı