Gündəlik 800 saatlıq efiri 6 nəfərlə monitorinq etmək mümkün olmur - Şura sədri

Azərbaycan Respublikası Audiovizual Şurası televiziya reklamlarında və verilişlərdə istifadə olunan əcnəbi sözlərin monitorinqini artıq süni intellekt texnologiyası ilə həyata keçirir. Bunu şura sədri İsmət Səttarov parlamentdə “Azərbaycan dilinin dövlət dili kimi inkişaf strategiyası: Mövcud vəziyyət və perspektivlər” mövzusuna həsr edilən konfransda çıxışı zamanı deyib.

O bildirib ki, hazırda test rejimində işləyən sistem 40 yaxın əcnəbi sözün istifadəsini aşkarlayıb. Son iki həftədə “ok” sözü reklam və verilişlərdə 104 dəfə istifadə olunub.

Ümumilikdə isə 3 minə yaxın hallarda əcnəbi sözlər qeydə alınıb.

Səttarovun sözlərinə görə, televiziyalarda 800 saatlıq məzmun yayımlanır və Şurada yalnız 6 nəfər çalışır, buna görə bütün proqramları fiziki olaraq monitorinq etmək mümkün deyil.

Prezidentin çıxışından sonra qərar verilib ki, süni intellektdən istifadə olunsun və sistem artıq test mərhələsində səmərəli işləyir.

Gülnar Nazimqızı