Qurumlar rəqəmsal texnologiya ilə Süni intellekti səhv salır - Akademik

Ölkədə süni intelektin (Sİ) real tətbiqi üçün ən vacib şərt geniş və keyfiyyətli data bazalarının formalaşdırılmasıdır. Bunu akademik Adil Qəribov  parlamentdə  Milli Məclisin Təbbi ehtiyatlar, energetika və ekologiya komitəsinin “İqlim dəyişikliyi ilə mübarizədə süni intellektin rolu” mövzusunda keçirilən elmi-praktik konfransda bildirib.

Onun sözlərinə görə, hazırda bir çox qurumlar rəqəmsal texnologiyalarla süni intellekti səhvən eyniləşdirir və bu, yanaşmanın effektivliyini azaldır.

Konfransda çıxış edən Qəribov qeyd edib ki, Sİ-yə keçidin hər bir qurum üzrə ayrıca iş xəritəsi olmalıdır, çünki “istənilən rəqəmsallaşma süni intellekt demək deyil”.

AMEA rəsmisi həmçinin bildirib ki, Azərbaycanda kənd təsərrüfatında quraqlaşma ilə bağlı açıq informasiya çatışmazlığı mövcuddur, halbuki belə məlumatlar Sİ modellərinin inkişafı üçün vacibdir.

Onun sözlərinə görə, Akademiyanın müxtəlif institutlarında son 30 ildə nüvə enerjisi, karbon emissiyaları və digər sahələr üzrə geniş tədqiqatlar aparılıb və yaxın illərdə İKT mütəxəssisləri ilə əməkdaşlıq nəticəsində daha əhatəli elmi məhsullar təqdim ediləcək.

Gülnar Nazimqızı