On bir ayda əhaliyə neçə manatlıq məhsul satılıb? - Məbləğ

2025-ci ilin yanvar-noyabr aylarında Azərbaycanda pərakəndə ticarət şəbəkəsində istehlakçılara 58,571.3 milyon manatlıq mal satılıb ki, bu da 2024-cü ilin eyni dövrü ilə müqayisədə real ifadədə 3,7% çoxdur. Bu artım ərzaq məhsulları, içkilər və tütün məmulatları üzrə 1,2%, qeyri-ərzaq malları üzrə isə 6,7% təşkil edib.Bu barədə Dövlət Statistika Komitəsindən bildirilib. 

Hesabat dövründə alıcıların pərakəndə şəbəkədə xərclədikləri vəsaitin 50,4%-i ərzaq məhsulları, 4,1%-i içkilər və tütün məmulatları, 14,9%-i geyim, ayaqqabı və toxuculuq məhsulları, 6,0%-i avtomobil benzini və dizel yanacağı, 4,8%-i elektrik malları və mebellər, 2,4%-i əczaçılıq məhsulları və tibbi ləvazimatlar, 1,4%-i kompüter və telekommunikasiya avadanlıqları, 16%-i digər qeyri-ərzaq mallarına sərf olunub.

Qeyri-dövlət sektorunda fəaliyyət göstərən təsərrüfat subyektləri satışların 99,8%-ni təmin edib. Müəssisələr üzrə pərakəndə ticarət dövriyyəsi real ifadədə 7,0%, fərdi sahibkarlar üzrə 1,2%, bazar və yarmarkalarda isə 4,8% artıb.

Hesabat dövründə əhalinin hər bir nəfəri orta hesabla aylıq 519,9 manatlıq alış edib, bunun 283,5 manatı ərzaq, içki və tütün məmulatlarına, 236,4 manatı isə qeyri-ərzaq mallarına yönəlib.

Gülnar