Astarada marketdən 91 ədəd saxta alkoqollu içki müsadirə edilib

Azərbaycan Qida Təhlükəsizliyi Agentliyi (AQTA) Astara rayonunun Pensər kəndində keçirilən yoxlama zamanı bir marketdən 91 ədəd saxta alkoqollu içki aşkarlayıb və məhsullar satışdan çıxarılıb.

Agentliyin məlumatına görə, Şərafət Mərhəldə qızı Nəcəfovaya məxsus mağazada “Golf Organic”, “Vip Line”, “Orginal Natura”, “Piterskaya”, “Wheat Water” və “Organic Brand” markalı içkilərin saxta olduğu müəyyən edilib.

Sahibkar barəsində inzibati protokol tərtib olunub, normativ tələblərə cavab verməyən məhsullar barədə məhdudlaşdırıcı qərar çıxarılıb. Nümunələr laboratoriya analizinə göndərilib.

AQTA bildirib ki, məsələ ilə bağlı araşdırmalar davam etdirilir.