Rusiya Azərbaycandakı diaspor rəhbərinə qarşı yekun ittiham irəli sürüb

Yekaterinburqda həbsdə saxlanılan Azərbaycan diasporunun rəhbəri Şahin Şıxlinskiyə qarşı yekun ittiham irəli sürülərək cinayət işi baxılması üçün məhkəməyə göndərilib. Bu barədə APA məlumat verib. 

İstintaq materiallarına görə, Şıxlinskiyə qarşı ifadələri Rusiya İstintaq Komitəsinin mühüm işlər üzrə müstəntiqi, ədliyyə mayoru A.S. Karapetyan alıb. Hadisə ilə bağlı ifadə verən şəxslərdən biri də Daxili İşlər Nazirliyinin əməkdaşı Karen Tutuncyandır.

Mənbələrin bildirdiyinə görə, istintaqda “birtərəflilik və ziddiyyətli məqamlar” müşahidə olunub.

Şıxlinski Rusiya Cinayət Məcəlləsinin 318-ci maddəsi (hakimiyyət nümayəndəsinə qarşı zor tətbiqi) və sifarişli qətlə cəhd ittihamları ilə məsuliyyətə cəlb olunur.

Hadisələr bu ilin iyun-iyul aylarında Yekaterinburqda azərbaycanlılara qarşı aparılan əməliyyatlar fonunda baş verib. Əməliyyat zamanı iki azərbaycanlı qardaş — Ziyəddin və Hüseyn Səfərov — aldıqları xəsarətlərdən ölüb, bir neçə nəfər isə müxtəlif illərə aid cinayət işi çərçivəsində həbs edilib.

Şıxlinski iyulun 2-də saxlanılsa da, həmin gün bir neçə saat dindirmədən sonra sərbəst buraxılmışdı. Daha sonra ona qarşı dövlət nümayəndəsinə qarşı zor tətbiqi ilə bağlı ayrıca cinayət işi açılıb və avqustun 2-də Moskvada yenidən saxlanılaraq Yekaterinburqa etap olunub.