Elçibəyin ailəsi prezidentə müraciət edəcək

 Milli azadlıq hərəkatının lideri, eks-prezident Əbülfəz Elçibəyin ailəsinin ölkə başçısı İlham Əliyevə müraciətinə hələlik cavab verilməyib.Bu barədə “Yeni Müsavat”a Ə. Elçibəyin oğlu Ərturqut Əliyev bildirib. Xatırladaq ki, Ə.Əliyev hələ yay aylarında Bakı Şəhər İcra Hakimiyyətinin başçısı Hacıbala Abutalıbovun qəbulunda olarkən atasına məxsus qiymətli arxiv materiallarının toplanması üçün müvafiq yer ayrılmasını, ev muzeyinin təşkil olunmasını istəmişdi.Lakin H. Abutalıbov buna onun səlahiyyətinin çatmadığını deyərək Elçibəy ailəsinə mənzil verilməsi üçün ölkə prezidentinə müraciət etməyi məsləhət görüb. Hətta Bakı meri “məktubu yazın, verin mənə, özüm çatdıracağam” - deyə, bildirib. Görüşdən bir müddət sonra Ə.Əliyev prezidentə yazılan məktubu özü İcra Hakimiyyətinə aparıb və məktubu H.Abutalıbovun tapşırığı əsasında müvafiq şöbəyə təqdim edib. Avqust ayında edilən müraciətə indiyədək cavab verilməməsinə Ə. Əliyevin yeganə arqumenti var: “Bəlkə məktubumuz prezidentə çatmayıb. Əks təqdirdə, hansısa cavab verilərdi”. Ə. Elçibəyin oğlu məsələ ilə bağlı H. Abutalıbova təkrar müraciət etməyə hazırlaşmasa da, ölkə prezidentinə növbəti dəfə müraciət etməyə hazırlaşır: “Yəqin ki, yaxın günlərdə prezidentə müraciət edəcəyik”.Ə. Əliyevdən Ə. Elçibəyə məxsus arxiv materiallarının toplanılması işində hansı yeniliklərin olduğu barədə də soruşduq. Bildirdi ki, hələlik ciddi irəliləyiş yoxdur: “Kimdən soruşuruqsa, deyirlər bizdə heç bir material yoxdur. Hələ ki, axtarışdayıq”.Qeyd edək ki, Ə.Əliyev Əbülfəz bəyin şəxsi əlyazmaları, videokasetləri, çıxışları, görüşləri, şəkilləri, Ankarada xəstə olduğu müddətdə yığılıb qalan əşyaları, BAB-dan qalan materiallarının olduğunu, ancaq onların məhv olma ehtimalının artdığını demişdi: “Bizim evdə bəzi yerdə nəmlik var, həmin materiallar da nəm çəkir. Hələ bunlar bizim evdə olanlardır. Xeyli materiallar dağınıq haldadır ki, kimdə olduğunu bilmirik. İstəyirdik ki, quru bir yer verilsin, o materiallar nəm çəkməsin, amma bir şey çıxmadı” - deyə, Ə.Əliyev bildirib.ANN.Az