Daha 606 hərbi qulluqçu mənzillə təmin olunacaq

Azərbaycan Prezidenti tərəfindən 2011-ci il dekabrın 28-də imzalanmış “Azərbaycan Ordusunun hərbi qulluqçularının sosial müdafiəsinin gücləndirilməsi tədbirləri barədə” 569 nömrəli Fərmanla yaradılmış Komissiyanın dekabrın 12-də növbəti iclası keçirilib.Bu barədə Maliyyə Nazirliyindən məlumat verilib.

İclasda Komissiyanın sədri, maliyyə naziri Sahil Babayev Prezident İlham Əliyevin hərbi qulluqçuların sosial-məişət şəraitinin yaxşılaşdırılması və dövlət hesabına mənzillə təmin edilməsi istiqamətində müəyyən etdiyi vəzifələrin icrası ilə bağlı görülən işlər barədə məlumat verib.

Babayev bildirib ki, indiyədək bu proqram çərçivəsində minlərlə hərbi qulluqçu dövlətin sosial proqramından faydalanaraq mənzillərlə təmin olunub.

Komissiyanın iclasında Müdafiə Nazirliyi tərəfindən təqdim olunmuş 606 nəfər hərbi qulluqçunun tam təmirli mənzillərlə təmin olunmasına dair qərar qəbul olunub. Qeyd edilib ki, cari il üzrə dövlət büdcəsində nəzərdə tutulmuş vəsait hesabına alınan tam təmirli mənzillər növbəti il ərzində hərbi qulluqçulara təqdim olunacaq.

Bu günə qədər dövlət vəsaiti hesabına 4167 hərbi qulluqçu mənzillərlə təmin olunub.