Azərbaycanda bayram və istirahət günlərində işə görə ödəniş artırılır -Deputat

Azərbaycanda istirahət günləri, səsvermə günləri, iş günü hesab edilməyən bayram günləri və ümumxalq hüzn günlərində görülən işə görə əməkhaqqının hesablanma qaydası dəyişdirilir. Bu barədə deputat Vüqar Bayramov öz sosial hesabında yazıb. 

 Bayramovun bildirdiyinə görə, “Əmək Məcəlləsi”nə təklif edilən dəyişikliklər əməkhaqqı ödənişi zamanı gündəlik tariflə yanaşı saatlıq tarif maaşının da nəzərə alınmasını nəzərdə tutur.

Dəyişikliklər Milli Məclisin Əmək və sosial siyasət komitəsində birinci oxunuşda dəstəklənərək plenar iclasa tövsiyə edilib.

Təkliflərə əsasən, həmin günlərdə:

Vaxtamuzd ödəniş sistemində əməkhaqqı gündəlik və saatlıq tarifin iki mislindən az olmayacaq. İşəmuzd sistemində əmək ikiqat işəmuzd qiymətləri ilə ödəniləcək. Aylıq maaş alan işçilərə iş aylıq norma daxilində görüldükdə maaşa əlavə olaraq gündəlik və saatlıq vəzifə maaşından az olmayan, norma aşılarsa ikiqat gündəlik və saatlıq vəzifə maaşından az olmayan məbləğ ödəniləcək.

Bayramov bildirib ki, saatlıq vəzifə maaşının məcəlləyə əlavə edilməsi işçilərin əmək hüquqlarının qorunması baxımından vacibdir, çünki bu günlərdə iş çox vaxt tam iş günü deyil, müəyyən saatlarla məhdudlaşır. Yeni yanaşma hər işlənən saat üçün əlavə ödənişi praktikada təmin edəcək.

Onun sözlərinə görə, saatlıq tarifi 25 manat olan işçi istirahət və ya bayram günündə 3 saat işləyərsə, əvvəlki yanaşmada 75 manat hesablandığı halda, yeni qaydalara əsasən ən azı 150 manat əməkhaqqı alacaq.

Deputat əlavə edib ki, Azərbaycanda saatlıq iş rejiminə keçidin müzakirə olunduğu bir dövrdə bu dəyişikliklər əməkhaqqı ödənişlərinin beynəlxalq standartlara uyğunlaşdırılmasına da imkan verəcək.

Gülnar