Azərbaycanda dini düşüncə və təhsil bir-birini təkzib etmir - Vəfa Yaqublu

Din və dünyagörüşü bir-birini təkzib etmir və gənc nəslin tərbiyəsində bu iki amil birgə nəzərə alınmalıdır. Bunu Bakıda keçirilən “Dini düşüncə mədəniyyəti: pedaqoji perspektivlər” konfransında Məktəbəqədər və Ümumi Təhsil üzrə Dövlət Agentliyinin direktor müavini Vəfa Yaqublu çıxış edərək bildirib. 

Yaqublunun sözlərinə görə, din vaxtilə Azərbaycan təhsilinin inkişafına töhfə verib.

 “Bizim məktəblərin rüşeymi Zərdüştlüyün təsiri ilə yaranıb və bu təsir altında ölkədə təhsil mədəniyyəti formalaşıb", - o deyib. 

O əlavə edib ki, məktəblərdə faktların öyrədilməsi ilə yanaşı, onların daşıdığı dəyərlər də gənclərə çatdırılmalıdır.

Direktor müavini vurğulayıb ki, dini düşüncəyə xurafat kimi yox, sosioloji elm kimi yanaşmaq lazımdır və bu sahədə təbliğatı mollalar yox, sosioloq-dinşünaslar həyata keçirməlidir.

Konfransda müzakirə olunan əsas mövzu gənc nəsilin milli-mənəvi dəyərlər ruhunda tərbiyəsi və müasir pedaqoji təlim modelləri olub.

Aytac