Məktəbəqədər təhsilə cəlb olunan bir uşaq dövlət büdcəsinə 4 500 manata başa gəlir - Emin Əmrullayev

Dövlət büdcəsində bir uşaq təxminən 4 500 manata başa gəlir. Bütün uşaqların sayını 4 500 manata vurduqda 1-5 yaş arası bu 2 milyarddan daha çox vəsait edir. Məntiqi olan insan üçün aydındır ki, bu, real rəqəm deyil, yəni məktəbəqədər təhsilin dövlət tərəfindən maliyyələşməsi.Bunu elm və təhsil naziri Emin Əmrullayev “Real TV”yə müsahibəsində deyib.

Nazir bildirib ki, Elm və Təhsil Nazirliyi artıq məktəbəqədər hazırlıq probleminin 85 faizdən çox hissəsini həll edib:

"Təbii ki, uşaq iki-üç il məktəbəqədər hazırlığa gedərsə, daha yaxşı olar. Bir yaşından beş yaşına qədər hər bir uşağın məktəbəqədər təhsillə əhatə olunması qarşıya qoyulmuş məqsədin mükəmməl həll yoludur".

Nazir ideal əhatə dairəsinin reallaşması üçün lazım olan maliyyə tərəfini açıqlayıb. O, hazırkı modeldə dövlətin böyük bir paya malik olduğunu və yüz mindən artıq uşağın dövlət sektorunda məktəbəqədər təhsilə cəlb olunduğunu bildirib.

Emin Əmrullayev əlavə edib ki, dünyanın aparıcı ölkələrində də məktəbəqədər təhsilə cəlb olunan bütün uşaqların yalnız dövlət tərəfindən maliyyələşməsi modellərinə demək olar ki, rast gəlinmir.