Abbas Abbasov axtarışa verilib

Azərbaycanın sabiq baş nazirinin birinci müavini Abbas Abbasov barəsində axtarış elan olunub. Qərar Dövlət Təhlükəsizliyi Xidmətində (DTX) “dövlət hakimiyyətini ələ keçirməyə yönələn hərəkətlər” ittihamı ilə aparılan cinayət işi çərçivəsində qəbul edilib.

İstintaq materiallarına əsasən, Abbas Abbasov cinayət işi üzrə istintaqa cəlb edilib, lakin ölkə hüdudlarından kənarda olması və istintaqdan yayındığı üçün barəsində axtarış qərarı çıxarılıb.

Abbas Abbasov 1992–2006-cı illərdə Azərbaycan Baş nazirinin birinci müavini vəzifəsində çalışıb, bu dövrdə bir neçə dövlət komissiyasına rəhbərlik edib. 2006-cı ildən sonra Rusiyada yaşamağa başlayıb.

DTX-nin topladığı materiallarda Abbas Abbasovun son illər ərzində Rusiyada Azərbaycan diaspor strukturlarına təsir göstərməyə çalışdığı, 2012-ci ildə yaradılan və “Milyarderlər İttifaqı” kimi tanınan Rusiya Azərbaycan Təşkilatları İttifaqının təsisçisi və rəhbəri olduğu qeyd olunur.

İstintaq sənədlərində həmçinin bildirilir ki, 2013-cü ilin əvvəlində Azərbaycanda formalaşdırılmış “Milli Şura”nın rəhbəri Rüstəm İbrahimbəyov sözügedən təşkilatın Koordinasiya Şurasının üzvü olub və bu proseslər Abbas Abbasovun bilavasitə nəzarəti altında həyata keçirilib.

Məlumata əsasən, istintaq çərçivəsində ölkə xaricindən Azərbaycana köçürüldüyü iddia edilən maliyyə vəsaitləri, audio-video yazılar, xaricdə keçirilmiş görüşlər və konstitusion dövlət hakimiyyətinin zorakı yolla ələ keçirilməsinə dair planlarla bağlı materiallar toplanaraq cinayət işinə əlavə edilib.

DTX bildirir ki, bu materiallar iş üzrə açıq məhkəmə baxışı zamanı ictimaiyyətə təqdim olunacaq.