Bizim üçün həbsdə olan jurnalist və siyasətçi yoxdur - Bəhruz Məhərrəmov/Video

Hazırda həbsdə olan şəxslər arasında jurnalist və ya sıravi siyasətçi yoxdur, yalnız dövlət hakimiyyətinə qarşı əməllərdə təqsirləndirilən və vətənin maraqlarını nəzərə almayan şəxslər var. Bunu Milli Məclisin deputatı Bəhruz Məhərrəmov dekabrın 16-da parlamentdə çıxışı zamanı deyib. 

O vurğulayıb ki, qalib müstəqil Azərbaycanda siyasi mənsubiyyətindən asılı olmayaraq hər kəs qanun qarşısında bərabərdir.

"Bu gün bizim üçün həbsdə nə jurnalist yoxdur nə siyasətçi, yalnız dövlət hakimiyyəti əleyhinə əməllərdə təqsirləndirilən, vətənin daşı yox könüllü sürətdə başqa dövlətlərin ayağının tozu olmağı seçmiş vətəndaşlar var. Quyruğu qapı arasında qalanda qanunun aliliyindən danışanlar isə unutmamalıdırlar ki, qalib müstəqil Azərbaycanda siyasi mənsubiyyətindən asılı olmayaraq hər kəs qanun qarşısında bərabərdir", - o bildirib. 

Deputat həmçinin qeyd edib ki, Azərbaycan Prezidenti tərəfindən elan edilən son amnistiya təşəbbüsü dövlətin vətəndaşına, o cümlədən yolunu azmış şəxslərə də sahib çıxmaq qabiliyyətini nümayiş etdirir və kənar, saxta hüquq müdafiə təşəbbüslərinə ehtiyac olmadığını göstərir.

Gülnar Nazimqızı