DGK: “Biləsuvar” postunda Naxçıvan–Bakı avtobusları üzrə gömrük nəzarəti qısa müddətdə bərpa olunub

Mediada Naxçıvan–Bakı reysi ilə gələn avtobus sərnişinlərinin “Biləsuvar” gömrük postunda uzun müddət gözlədiyi barədə yayılan videogörüntülərlə bağlı Dövlət Gömrük Komitəsi (DGK) açıqlama verib.

DGK APA-ya bildirib ki, gün ərzində “Biləsuvar” postundan keçməklə Naxçıvan–Bakı marşrutu üzrə 5 avtobusla 200-dən çox sərnişin daşınır və gömrük nəzarəti adətən optimal müddətdə həyata keçirilir.

Komitənin məlumatına görə, dekabrın 17-də sərnişinlərin idxal nəzarət xəttinə kütləvi şəkildə daxil olması, həmçinin bəzi şəxslərin gətirdikləri mallar üzrə bəyannamələri vaxtında təqdim etməməsi nəzarət tədbirlərinin qismən uzanmasına səbəb olub. Qısa müddətdə görülən tədbirlər nəticəsində vətəndaşların sürətli keçidi tam təmin edilib.

DGK sərhədkeçmə və rəsmiləşdirmə proseslərinin lüzumsuz yubanmaması üçün vətəndaşlara gömrük qanunvericiliyinə riayət etməyi tövsiyə edib.