Azərbaycan Ermənistana neft məhsullarının ixracına başlayır/Yenilənib

Prezident İlham Əliyevin qərarı ilə oktyabr ayında Azərbaycandan Ermənistana yüklərin tranziti ilə bağlı işğaldan bəri mövcud olan məhdudiyyətlərin aradan qaldırılmasından sonra qonşu ölkəyə yük göndərişi davam edir.

Bu çərçivədə, dekabrın 18-də Azərbaycan Dövlət Neft Şirkəti (SOCAR) tərəfindən ilk dəfə olaraq yerli mənşəli neft məhsulunun Ermənistana tədarükü həyata keçirilib.

SOCAR-a məxsus 22 vaqona yüklənmiş 1 220 ton Aİ-95 markalı avtomobil benzini “Azərbaycan Dəmir Yolları” QSC-nin yük qatarı ilə Bakı Yük Stansiyasından Böyük Kəsik stansiyası istiqamətində yola salınıb. Yük Gürcüstan ərazisindən tranzit keçməklə Ermənistana çatdırılacaq.

11:46

Azərbaycanla Ermənistan arasında sülh gündəliyinə uyğun olaraq, dekabrın 18-də Azərbaycandan Ermənistana neft məhsullarının ixracına start verilib.

APA-nın məlumatına görə, noyabrın 28-də Qəbələdə Azərbaycan Baş nazirinin müavini Şahin Mustafayev və Ermənistan Baş nazirinin müavini Mher Qriqoryan arasında əldə edilmiş razılaşmaya əsasən, SOCAR tərəfindən istehsal olunmuş Aİ-95 markalı 22 vaqon benzin bu gün yola salınıb.

Azərbaycanın neft məhsullarının ixracı kommersiya xarakteri daşıyır və beynəlxalq bazar qiymətlərinə uyğun həyata keçiriləcək. Ermənistan Baş nazirinin müavini Mher Qriqoryan bildirib ki, gələcək əməliyyatlar özəl ixracatçılar və idxalçılar arasında bazar əsaslı şərtlərlə aparılacaq.

Qeyd olunur ki, bu, tərəflər arasında enerji sahəsində ilk rəsmi danışıqlardan biridir və gələcək əməkdaşlıq bazar prinsiplərinə uyğun olaraq davam etdiriləcək.

Gülnar Nazimqızı