Azərbaycanda əmək müqavilələrinin sayı 2018–2025-ci illərdə 45% artıb – nazir

2018–2025-ci illər ərzində Azərbaycanda əmək müqavilələrinin sayı 45% və ya 595 min vahid artıb və bu artımın 92%-i özəl sektorun payına düşüb. Bunu əmək və əhalinin sosial müdafiəsi naziri Anar Əliyev bildirib.

Nazirin sözlərinə görə, qeyd olunan dövrdə əməkhaqqı fondu 3,2 dəfə artıb. Qeyri-dövlət sektoru üzrə əməkhaqqı fondunda artım daha yüksək olub və 3,6 dəfə yüksəlib.

Anar Əliyev vurğulayıb ki, əhalinin aktiv məşğulluğunun təmin edilməsi məqsədilə Prezidentin müvafiq Sərəncamı ilə təsdiqlənmiş “2019–2030-cu illər üçün Azərbaycan Respublikasının Məşğulluq Strategiyası” uzunmüddətli dövlət məşğulluq siyasətinin əsasını təşkil edir və əmək bazarının müasir çağırışlarına uyğun islahatları nəzərdə tutur.

Nazir bildirib ki, islahatların başlandığı dövrdən etibarən 2,1 milyondan çox şəxs aktiv məşğulluq tədbirləri ilə əhatə olunub. Onlardan 823 min nəfər işlə təmin edilib, 82 peşə istiqaməti üzrə 54 mindən çox şəxs peşə hazırlığına cəlb olunub, 111 min nəfər isə özünüməşğulluq proqramından yararlanıb.

Bundan əlavə, bu müddət ərzində 1,2 milyon nəfərə peşəyönümlü məsləhət xidmətləri göstərilib. Rəsmilər bu göstəriciləri əmək bazarında leqallaşmanın və özəl sektorun rolunun artmasının göstəricisi kimi qiymətləndirirlər.

Gülnar Nazimqızı