Ötmə qaydalarının pozulması 11 ayda 470 ağır yol qəzasına səbəb olub – BDYPİ

Bu ilin 11 ayı ərzində Azərbaycanda qarşıdan gələn nəqliyyat vasitələrinin hərəkət zolağına çıxma və ötmə qaydalarının pozulması nəticəsində ölüm və xəsarətlə nəticələnən 470 yol-nəqliyyat hadisəsi qeydə alınıb. Bu barədə Baş Dövlət Yol Polisi İdarəsi (BDYPİ) məlumat yayıb.

BDYPİ bildirib ki, statistik göstəricilər ağır nəticəli yol qəzalarının əsas səbəbləri arasında ötmə və manevretmə qaydalarının pozulmasının xüsusi yer tutduğunu göstərir. Quruma görə, qarşı hərəkət zolağına düşünülməmiş şəkildə çıxmaq, yolun görünüş məsafəsini və hərəkət intensivliyini düzgün qiymətləndirməmək, tələskənlik və sürücünün özünə həddindən artıq güvənməsi ciddi fəsadlara yol açır.

Açıqlamada vurğulanıb ki, bu cür qayda pozuntuları əks istiqamətdə hərəkət edən avtomobillərlə toqquşma, nəqliyyat vasitəsinin aşması və digər yol hərəkəti iştirakçılarının həyat və sağlamlığı üçün birbaşa təhlükə yaradır.

BDYPİ sürücüləri ötmə və manevretmə zamanı qarşıdan gələn nəqliyyat vasitəsinə olan məsafəni düzgün qiymətləndirməyə, yol və hava şəraitini nəzərə almağa, sükan arxasında səbir və məsuliyyət nümayiş etdirməyə çağırıb.

Aytac