DYP sürücülərə müraciət edib

Baş Dövlət Yol Polisi İdarəsi (BDYPİ) həftəsonu yollardakı vəziyyətlə bağlı hərəkət iştirakçılarına müraciət edib.

BDYPİ bildirib ki, həftəsonları əhalinin istirahət məkanlarına və bölgələrə səyahəti ilə əlaqədar avtomobil yollarında hərəkət intensivliyi artır və bu, qəza ehtimalını yüksəldir. Yollarda nəzarət və profilaktik tədbirlər gücləndirilsə də, sürücülərin tələskənliyi və diqqətsizliyi qəza sayının artmasına səbəb olur. 

İdarə sürücülərə yol və hava şəraitini əvvəlcədən qiymətləndirməyi, nasaz nəqliyyat vasitəsi ilə yola çıxmamağı və yorğun ya yuxusuz halda sükan arxasında olmamağı tövsiyə edib. Sürət rejiminə, eləcə də ötmə və manevr zamanı təhlükəsizlik qaydalarına ciddi riayət olunmasının vacib olduğu vurğulanıb.