“İçərişəhər” stansiyasında dönmə tunelinin tikintisinə başlanılır

“Bakı Metropoliteni” QSC metronun “İçərişəhər” stansiyasının arxasında dönmə tunelinin inşasına start verib. Bu barədə qurumdan bildirilib. 

Layihənin əsas məqsədi xəttlərin ayrılması ilə qatarlararası intervalların azaldılması və sərnişin xidmətinin keyfiyyətinin artırılmasıdır.

Dönmə kamerası qatarların geri dönməsini və platformaların istifadəsini optimallaşdıracaq, sərnişin axınının təhlükəsiz və rahat tənzimlənməsinə imkan yaradacaq. Pik saatlarda ehtiyat qatarlar burada saxlanılacaq, texniki nasazlıq zamanı qatarlar xətdən operativ çıxarılacaq.

Layihə çərçivəsində ərazinin yerüstü hissəsi piyada zonası və yaşıllıq sahəsinə çevriləcək, yeraltı hissədə isə 200-dən çox avtomobil üçün çoxmərtəbəli parkinq tikiləcək. Tikinti müddətində “İçərişəhər” stansiyası fəaliyyəti dayandırılmayacaq və bitişik küçədən nəqliyyat vasitələrinin hərəkətinə məhdudiyyət tətbiq olunmayacaq.