MEDİA: Süni intellekt dövründə sağlam informasiya mühitinin qorunması strateji əhəmiyyət daşıyır

Süni intellekt texnologiyalarının sürətlə inkişaf etdiyi bir dövrdə sağlam informasiya mühitinin qorunması xüsusi əhəmiyyət kəsb edir. Bunu Medianın İnkişafı Agentliyinin (MEDİA) icraçı direktoru Əhməd İsmayılov Media Savadlılığı Konfransında bildirib.

İsmayılovun sözlərinə görə, son dörd ildə ilin sonunda media savadlılığı mövzusu ətrafında sistemli və ardıcıl fəaliyyətin təşkili Azərbaycanda ənənəyə çevrilib.

O qeyd edib ki, rəqəmsallaşmanın dərinləşməsi və informasiya istehsalı ilə istehlakının artması fonunda təhlükəsizlik, məsuliyyətlilik və etibarlılıq prinsiplərinə əsaslanan media savadlılığı cəmiyyət üçün mühüm dəyər formalaşdırır.

MEDİA rəhbəri vurğulayıb ki, rəqəmsal media mühitinin genişlənməsi və sosial şəbəkələrin ictimai rəyə təsir imkanlarının artması informasiyanın düzgünlüyü və obyektivliyinin qorunmasını prioritetə çevirir. Onun sözlərinə görə, qlobal informasiya təhdidləri şəraitində vətəndaşların etibarlı və obyektiv məlumata çıxışının təmin edilməsi xüsusilə vacibdir.

Əhməd İsmayılov əlavə edib ki, media savadlılığının gücləndirilməsi təkcə jurnalistlərin deyil, eyni zamanda məlumat istehlakçısı olan geniş auditoriyanın da üzərinə düşən ümumi məsuliyyətdir.