Prezident Xankəndidə məktəbin açılışında iştirak edib

Azərbaycan Prezidenti İlham Əliyev dekabrın 23-də Xankəndi şəhərinin Kərkicahan qəsəbəsində yerləşən 1 nömrəli tam orta məktəbin əsaslı təmirdən sonra açılışında iştirak edib.

Elm və təhsil naziri Emin Əmrullayev bildirib ki, 624 şagird yerlik məktəbdə təmir işləri qısa müddətdə və yüksək səviyyədə aparılıb. Məktəbdə 17 sinif otağı, laboratoriyalar, STEAM və informatika sinifləri, hərbi hazırlıq, biologiya, kimya və fizika kabinetləri, kitabxana, idman və akt zalları, yeməkxana yaradılıb.

Məktəbin həyətyanı sahəsində açıq idman meydançası da salınıb. Bütün otaqlar zəruri tədris avadanlıqları ilə təchiz edilib.