Deputat: Patent qanununda dəyişiklik innovasiya və əqli mülkiyyətin qorunmasını gücləndirəcək

Milli Məclisin deputatı Vasif Qafarov müzakirəyə çıxarılan “Patent haqqında” Qanunda dəyişiklik layihəsini innovasiya, ixtiraçılıq və əqli mülkiyyətin qorunması sahəsində ölkənin hüquqi bazasının beynəlxalq standartlara uyğunlaşdırılması baxımından vacib və vaxtında təşəbbüs adlandırıb.

Deputat bildirib ki, qanun layihəsi patent və ixtira prosedurlarının sadələşdirilməsi, ekspertiza müddətlərinin qısaldılması və iddiaçıların texniki və inzibati çətinliklərinin aradan qaldırılması imkanlarını nəzərdə tutur.

Xarici iddiaçıların milli patent ofisinə birbaşa müraciət edə bilməsi Azərbaycanın əqli mülkiyyət sistemini daha açıq və rəqabətə davamlı edəcək.

Vasif Qafarov vurğulayıb ki, layihədə xidməti tapşırıq əsasında yaradılan ixtiralara görə müəlliflərə ən azı 50 faiz qonorar ödənilməsinin qanunla təsbit olunması sosial ədalət prinsipini təmin edir və ixtiraçıların əməyinə real qiymət verilməsinə töhfə verəcək.

Deputat əlavə edib ki, qanun layihəsinin qəbul edilməsi ölkədə ixtira və patent fəaliyyətinin artmasına, innovativ həllərin sənayedə tətbiqinə və Qlobal İnnovasiya İndeksində Azərbaycanın mövqeyinin yaxşılaşmasına şərait yaradacaq.

Həmçinin, startaplar, gənc ixtiraçılar, ali təhsil müəssisələri və elmi-tədqiqat institutlarını stimullaşdırmaq, patentlərin istehsalata və bazara çıxarılmasını asanlaşdıran mexanizmlər yaratmaq, eləcə də patent müraciətləri və ekspertiza proseslərini tam rəqəmsallaşdırmaq üçün “vahid pəncərə” sisteminin yaradılması təklif edilir.

“Qanun layihəsi strateji əhəmiyyətə malikdir və innovativ inkişafa, elmi-texniki tərəqqiyə və əqli mülkiyyətin qorunmasına mühüm töhfə verəcək. Mən layihəni dəstəkləyirəm və həmkarlarımı da dəstəkləməyə çağırıram”, – deputat vurğulayıb.

Gülnar Nazimqızı