BMT baş katibi Maduronun həbsi fonunda Venesuelada qeyri-sabitliyin artmasından narahatdır

BMT-nin baş katibi Antonio Quterreş prezident Nikolas Maduronun həbsindən sonra Venesuelada qeyri-sabitliyin dərinləşə biləcəyi ilə bağlı ciddi narahatlığını ifadə edib.

Maduronun Manhettendə federal məhkəmədə çıxış etməsindən bir neçə saat əvvəl BMT Təhlükəsizlik Şurasının 15 üzvü Nyu-Yorkdakı qərargahda qapalı iclas keçirib.

Quterreşin bəyanatını Şuraya BMT-nin siyasi məsələlər üzrə baş katibinin müavini Rozmari DiKarlo təqdim edib. Bəyanatda qeyd olunub ki, ölkədə mümkün eskalasiya, bunun regiona təsiri və dövlətlərarası münasibətlər üçün yarada biləcəyi presedent baş katibi ciddi şəkildə narahat edir.

ABŞ-ın BMT-dəki səfiri Mayk Uolz Təhlükəsizlik Şurasına bildirib ki, ABŞ Nikolas Maduro və onun həyat yoldaşı Siliya Floresə qarşı “Amerika ədalətindən qaçan iki şəxsə” yönəlmiş, hərbçilərin dəstəyi ilə “dəqiq hüquq-mühafizə əməliyyatı” həyata keçirib.

Uolz ABŞ dövlət katibi Marko Rubionun mövqeyinə istinad edərək vurğulayıb ki, Vaşinqtonun Venesuelaya və ya onun xalqına qarşı müharibə niyyəti yoxdur və ölkənin işğalından söhbət getmir. Onun sözlərinə görə, ABŞ Qərb yarımkürəsinin düşmən qüvvələr üçün əməliyyat bazasına çevrilməsinə imkan verməyəcək və Venesuelanın böyük enerji ehtiyatlarının “qanunsuz liderlərin və xarici qüvvələrin nəzarətində qalması” qəbuledilməzdir.

Venesuelanın BMT-dəki səfiri Samuel Moncada isə ABŞ-ın Maduronu həbs etməsini “heç bir hüquqi əsası olmayan qanunsuz silahlı hücum” kimi qiymətləndirib. O bildirib ki, Venesuelada dövlət institutları normal fəaliyyət göstərir, konstitusiya qaydası qorunur və hökumət ölkə ərazisinə tam nəzarət edir.

Antonio Quterreş bütün tərəfləri inklüziv və demokratik dialoqa çağıraraq, Venesuela böhranının sülh yolu ilə həllinə yönəlmiş təşəbbüsləri dəstəkləməyə hazır olduğunu bəyan edib.

Gülnar Nazimqızı