Dərəyə yıxılıb köməksiz qalan qadın xilas edilib

Şəki şəhəri ərazisində vətəndaş çay dərəsinə yıxılaraq köməksiz vəziyyətdə qalıb.Bu barədə Fövqəladə Hallar Nazirliyi məlumat yayıb.

Bildirilib ki, nazirliyin “112” qaynar telefon xəttinə Şəki şəhəri ərazisində vətəndaşın çay dərəsinə yıxılaraq köməksiz vəziyyətdə qalması barədə məlumat daxil olub.

Məlumatla əlaqədar dərhal FHN-in Dövlət Yanğından Mühafizə Xidmətinin Şəki Rayon Yanğından Mühafizə Hissəsinin yanğınsöndürən-xilasediciləri hadisə yerinə cəlb olunub.

Əməliyyat şəraiti qiymətləndirilərkən məlum olub ki, 1952-ci il təvəllüdlü M. Əzəmmədova təxminən 30 metr hündürlükdən çayın dərəsinə yıxılıb, müxtəlif dərəcəli bədən xəsarətləri alaraq köməksiz vəziyyətdə qalıb.

Xilasedicilər xüsusi vasitələrdən istifadə etməklə qadını çay dərəsindən çıxararaq xilas edib və təcili tibbi yardım briqadasına təhvil veriblər.