“Nestle”nin geri çağrılan uşaq qidaları Azərbaycanda varmı? - Açıqlama

“Nestle” şirkətinin uyğunsuzluq aşkarlanan uşaq qidalarının Azərbaycan Respublikasının ərazisinə idxal edilmədiyi müəyyən olunub. Bu barədə Azərbaycan Respublikası Qida Təhlükəsizliyi Agentliyi (AQTA) məlumat yayıb.

Agentliyin bildirdiyinə görə, qida təhlükəsizliyinin təmin edilməsi və idxal olunan məhsullarla bağlı potensial risklərin vaxtında müəyyənləşdirilməsi məqsədilə beynəlxalq səviyyədə baş verən hadisələr gündəlik əsasda sistemli şəkildə təhlil olunur.

Məlumata əsasən, “Nestle” şirkəti körpələr və erkən yaşlı uşaqlar üçün nəzərdə tutulan bəzi qida məhsulları ilə bağlı ehtiyat tədbiri xarakterli geri çağırma qərarı qəbul edib. Avstriya, Danimarka, Finlandiya, Almaniya, İrlandiya, İtaliya, İsveçrə və Birləşmiş Krallıqda “SMA”, “BEBA”, “ALFAMINO”, “Pre NAN” və digər ticarət nişanları altında istehsal olunan məhsulların müəyyən partiyaları dövriyyədən çıxarılıb.

Geri çağırmaya səbəb istehsal prosesi zamanı məhsulların “Bacillus cereus” bakteriyası ilə çirklənmə ehtimalı olub.

AQTA bildirib ki, mövcud məlumatlara əsasən, dünya üzrə geri çağrılan ümumilikdə 123 məhsul partiyasının heç biri Azərbaycana idxal edilməyib. Bununla yanaşı, ehtiyat tədbiri olaraq ölkə ərazisində satışda olan digər “Nestle” məhsul partiyalarından nümunələr götürülərək laborator müayinələrə cəlb edilib.

Araşdırmaların nəticələri barədə ictimaiyyətə əlavə məlumat veriləcəyi qeyd olunub.

Gülnar