Elşad Xose söyüş söydüyünə görə həbs olunub

Məşhur reper Elşad Xose (Elşad Nazim oğlu Əliyev, 1979-cu il təvəllüdlü) inzibati qaydada 15 gün müddətinə həbs olunub. Bu barədə Qaynarinfo məlumat yayıb.

Reper Yasamal rayonu, Ş.Qurbanov küçəsində ünvansız nalayiq ifadələr işlətməkdə ittiham olunaraq İnzibati Xətalar Məcəlləsinin 510 və 535.1-ci maddələri ilə təqsirli bilinib.

Elşad Xose həbsdən azad olunmaq üçün Bakı Apellyasiya Məhkəməsinə şikayət verib. Məhkəmədə o, ailəli olduğunu, ictimai xadim kimi fəaliyyət göstərdiyini və müalicə aldığını qeyd edib.

Lakin Apellyasiya Məhkəməsi inzibati xəta işinə dair qərarı qüvvədə saxlayıb və reperin apellyasiya şikayətini təmin etməyib.