Gəncədə dəm qazından zəhərlənmə: 5 nəfər xəstəxanaya yerləşdirilib

Yanvarın 12-də saat 02:20 radələrində Gəncə şəhərində dəm qazından zəhərlənmə hadisəsi baş verib.

TƏBİB-dən  verilən məlumata görə, 2 azyaşlı (1 qız, 1 oğlan) Gəncə Şəhər Birləşmiş Xəstəxanasının nəzdindəki Uşaq Xəstəxanasına, 3 nəfər isə (1 kişi, 2 qadın) Akademik Z.Məmmədov adına xəstəxananın Təcili tibbi yardım şöbəsinə hospitalizasiya olunub.

Diaqnoz “dəm qazının toksiki təsiri” kimi müəyyən olunub və pasiyentlərə zəruri tibbi xidmət göstərilib. Vəziyyətləri qənaətbəxş olan şəxslər ambulator müalicə üçün evə buraxılıblar.

APA-nın yerli bürosunun məlumatına görə, zəhərlənənlər 1972-ci il təvəllüdlü S. Hüseynov, 1968-ci il təvəllüdlü G. Rüstəmova, 1994-cü il təvəllüdlü Ü. Hüseynova, 2014-cü il təvəllüdlü Q. Hüseynov və 2017-ci il təvəllüdlü S. Hüseynova olub. Onlar yaşadıqları evin qonaq otağında dəm qazından zəhərləniblər və bir ailənin üzvləridir.

Hazırda hadisə yerinə aidiyyəti qurumların əməkdaşları cəlb olunub və faktla bağlı araşdırma aparılır.