Dənizə axıdılan sular 100 faiz təmizlənməlidir - Prezident

Hazırda Azərbaycanda kanalizasiya xidməti ilə əhatə olunan əhali cəmi 50 faiz təşkil edir və yeni dövlət proqramının icrası nəticəsində bu göstərici 95 faizə çatdırılmalıdır. Bunu Prezident İlham Əliyev keçirdiyi müşavirədə bildirib.

Əliyevin sözlərinə görə, leysan yağışları zamanı şəhər nəqliyyatının iflic olması ciddi problemlər yaradır və Bakıda yağış sularının idarə olunması sahəsində zəifliklər mövcuddur.

Bu məqsədlə paytaxtın 30 küçəsində yeni yağış suyu kollektor şəbəkəsi qurulacaq.

Prezident qeyd edib ki, dənizə axıdılan sular 100 faiz təmizlənməlidir və bu istiqamətdə əlavə tədbirlər görüləcək. Xəzər dənizinin çirklənməsinin qarşısının alınması üçün Hövsan sutəmizləyici stansiyasının modernləşdirilməsi və gücünün artırılması planlaşdırılır.

Əliyev həmçinin su sektorunda rəqəmsal idarəetmə sisteminin tətbiq ediləcəyini bildirib və Abşeron yarımadasında ilk dəfə duzsuzlaşdırma zavodunun inşa olunacağını açıqlayıb. Onun sözlərinə görə, layihə xarici investisiyalar hesabına həyata keçiriləcək və Bakının, eləcə də Abşeron yarımadasının içməli su təminatını artıracaq, eyni zamanda suvarma üçün əlavə mənbə yaradacaq.

Gülnar Nazimqızı