BDYPİ sürücülərə hava şəraiti ilə bağlı xəbərdarlıq edib

Qarşıdakı günlərdə Azərbaycanda hava şəraitinin dəyişəcəyi, yağıntı və duman səbəbindən yollarda görünüş məsafəsinin məhdudlaşacağı gözlənilir. Bu barədə Milli Hidrometeorologiya Xidmətindən bildirilib. 

Baş Dövlət Yol Polisi İdarəsi (BDYPİ) əlverişsiz hava şəraitini nəzərə alaraq yol hərəkəti iştirakçılarını diqqətli olmağa və təhlükəsizlik qaydalarına ciddi əməl etməyə çağırıb.

BDYPİ-nin xəbərdarlığında sürücülərə hərəkət sürətini yol və hava şəraitinə uyğun seçmək, təhlükəsiz ara məsafəsini qorumaq, kəskin manevr və qəfil əyləcləmələrdən çəkinmək tövsiyə olunub. Bildirilib ki, nəqliyyat vasitələrinin faraları, şüşələri və işıq siqnalları saz vəziyyətdə olmalı, yaxın və gabarit işıqları daim yanılı saxlanılmalıdır.

Qurum əlavə edib ki, görünüş məsafəsi kəskin azaldıqda duman əleyhinə işıqlardan yalnız zərurət olduqda istifadə edilməli, uzaq işıqlar isə qarşıdan gələn sürücülərin görmə qabiliyyətini zəiflətdiyi üçün əsassız şəkildə yandırılmamalıdır.

Xəbərdarlıqda piyadalara da çağırış edilib: məhdud görünmə şəraitində yolu yalnız müəyyən edilmiş keçidlərdən keçmək və daha ehtiyatlı davranmaq tövsiyə olunur.