Ali Məhkəmə müflis bankla bağlı ödəmə tapşırıqları üzrə vahid təcrübə müəyyən edib

Ali Məhkəmənin Kommersiya kollegiyası müflis elan olunmuş bankla bağlı ödəmə tapşırıqlarından irəli gələn mübahisələr üzrə vahid məhkəmə təcrübəsini müəyyən edən qərar qəbul edib.

İş iddiaçı ASC-nin cavabdeh banka təqdim etdiyi ödəmə tapşırıqlarının icra edilməməsi ilə bağlıdır. Birinci instansiya məhkəməsi iddianı qiyabi qətnamə ilə təmin edib, lakin sonradan cavabdeh bankın müflis elan olunması əsas gətirilərək qiyabi qətnamə ləğv edilib və iş üzrə icraata xitam verilib.

Birinci və apellyasiya instansiya məhkəmələri bu mövqeni bankın müflis elan olunmasından sonra bütün məhkəmə icraatlarının dayandırılması və tələblərin yalnız iflas proseduru çərçivəsində irəli sürülməsi ilə əsaslandırmışdı.

Ali Məhkəmə isə qərara alıb ki, müflis banka qarşı iddialar iki qrupa bölünür: birincisi, bankın kreditor tələbləri ilə bağlı iddialar, ikincisi isə bank fəaliyyəti və hüquqi şəxs kimi hüquq qabiliyyətindən irəli gələn mübahisələr. Yalnız birinci qrup iflas proseduru çərçivəsində baxılmalı, ikinci qrup isə ümumi iddia icraatı qaydasında araşdırılmalıdır.

Məhkəmə müəyyən edib ki, baxılan iş bankın kreditor tələbləri ilə bağlı deyil, iddiaçının öz hesablarında olan vəsaitlərin icra edilməmiş ödəmə tapşırıqları ilə əlaqədardır və həmin tapşırıqlar verildiyi vaxt bank hələ müflis elan olunmayıb. Bu səbəbdən iddiaçının tələbləri “Banklar haqqında” Qanunun müvafiq maddələri ilə tənzimlənir.

Nəticədə Ali Məhkəmə apellyasiya instansiyasının qərarını ləğv edib və ASC-nin kassasiya şikayətini təmin edib.