BDU-nun 1 saylı korpusu təmirə bağlanır, tələbələr iki universitetə müvəqqəti köçürülür

Bakı Dövlət Universitetinin (BDU) təmirə bağlanacaq 1 saylı tədris korpusunda təhsil alan tələbələr müvəqqəti olaraq digər ali məktəblərdə yerləşdiriləcək.

Qafqazinfo.az-ın əldə etdiyi məlumata görə, tələbələr müəyyən müddət ərzində Odlar Yurdu Universitetində və fəaliyyəti dayandırılmış Asiya Universitetinin binalarında təhsillərini davam etdirəcəklər. Təhsilalanlara bu barədə artıq rəsmi məlumat verilib.

Yeni semestrdən etibarən tələbə sayı çox olan Beynəlxalq münasibətlər və İqtisadiyyat fakültələri Odlar Yurdu Universitetinə, Hüquqşünaslıq və Filologiya fakültələri isə Asiya Universitetinin binasına köçürüləcək.

 BDU-nun 1 saylı tədris korpusunun əsaslı təmiri ilə bağlı elan edilmiş 23 milyon manatlıq tenderin qalibi “Koneks Construction” MMC olub. Universitet rəhbərliyi təmir işlərinin müddəti ərzində tədris prosesinin fasiləsiz davam etdirilməsini məqsəd qoyur.