Ötən il fermerlərə nə qədər sığorta ödənişi edilib? - Rəsmi

2025-ci ildə müxtəlif hadisələr nəticəsində zərər çəkmiş fermer və təsərrüfatlara ümumilikdə 9,2 milyon manat sığorta ödənişi edilib. Bu göstərici 2024-cü illə müqayisədə 44%, 2023-cü illə müqayisədə isə 2,1 dəfə çoxdur. Bu barədə Aqrar Sığorta Fondundan bildirilib. 

Hesabat ilində bitkiçilik sahəsində baş verən hadisələrə görə fermerlərə 8,8 milyon manat ödənilib ki, bu da 2024-cü illə müqayisədə 70%, 2023-cü illə müqayisədə isə 2,5 dəfə artım deməkdir.

Müqayisə üçün, Aqrar Sığorta Fondu 2023-cü ildə 4,4 milyon manat, 2024-cü ildə isə 6,4 milyon manat sığorta ödənişi həyata keçirmişdi.

Fondun məlumatına əsasən, 2025-ci ildə sığortalanan 41 bitki növündən 26-sı üzrə ödəniş aparılıb. Ən böyük məbləğ taxıl sahələrinin payına düşüb: buğda və arpa üzrə ödənişlər 5 milyon 175 min manat təşkil edib ki, bu da bir il əvvəlki göstəricidən 63% və ya 2 milyon manat çoxdur.

Pambıq sahələri üzrə ödənişlər 958 min manat olub, bu da illik müqayisədə 8% artım deməkdir. Taxıl və pambıqdan sonra ən çox sığorta ödənişi şaftalı, qarğıdalı, badam, günəbaxan, tütün, alma, armud, üzüm və ərik sahələri üzrə həyata keçirilib.

Heyvandarlıq təsərrüfatlarında baş vermiş zərərlərə görə isə 2025-ci ildə 394 min manat sığorta ödənişi edilib.

Azərbaycanda aqrar sığorta mexanizmi dövlət dəstəyi ilə fəaliyyət göstərir. Fermerlər üçün sığorta haqqının 50%-ni dövlət ödəyir, bu da əkin sahələrinin və təsərrüfatların aşağı xərclə sığortalanmasına imkan yaradır.

Gülnar Nazimqızı