“Tərtər işi”ndə 600 min tələb etsələr də onlara 20 min ödəniləcək

2017-ci ildə “Tərtər hadisələri” zamanı vəfat etmiş polkovnik-leytenant Saleh Qafarovun iki övladına dövlət tərəfindən təzminat ödəniləcək.

Nəsimi Rayon Məhkəməsinin qərarına əsasən, mərhum zabitin hər bir övladına 10 min manat olmaqla, ümumilikdə 20 min manat kompensasiya ayrılması qərara alınıb. Məhkəmə iddianı qismən təmin edib.

İddiaçılar atalarının ölümü ilə bağlı hər biri üçün 600 min manat təzminat tələb etmişdilər. İş üzrə cavabdeh qismində Maliyyə Nazirliyi tanınıb. Nazirliyin nümayəndəsi iddia ilə razılaşmayaraq, qurumun hərəkətləri nəticəsində iddiaçılara zərər dəymədiyini bildirib.

Qərardan həm iddiaçılar, həm də Maliyyə Nazirliyi narazı qalıb.

“Tərtər işi” üzrə istintaq yeniləndikdən sonra Saleh Qafarova bəraət verilib. 2024-cü ildə onun həyat yoldaşı Natəvan Qafarovaya 50 min manat təzminat ödənilib.

Yenilənmiş istintaq çərçivəsində, aralarında yüksəkrütbəli zabitlərin də olduğu bir neçə hərbçi həbs edilib və barələrində məhkəmə hökmü çıxarılıb.