İRİA xəbərdarlıq edir: “mygov” adından 1500 manatlıq sosial yardım elanları saxtadır

Son günlər sosial şəbəkələrdə “mygov” platformasının adından “2026-cı il üzrə 1500 manat məbləğində ünvanlı dövlət sosial yardımının verilməsi” ilə bağlı yayılan elanlar saxta xarakter daşıyır. Bu barədə İnnovasiya və Rəqəmsal İnkişaf Agentliyi (İRİA) məlumat yayıb.

Rəsmi açıqlamada bildirilib ki, yayılan məlumatlar həqiqəti əks etdirmir və sözügedən paylaşımların “mygov” platforması ilə heç bir əlaqəsi yoxdur.

Agentliyin məlumatına görə, bu cür paylaşımlar dələduzluq məqsədi daşıyır, vətəndaşları çaşdırmağa, onları saxta keçidlər (linklər) vasitəsilə fərdi məlumatlarını paylaşmağa təşviq edir.

İRİA vətəndaşları ayıq-sayıq olmağa, şübhəli paylaşımlara və naməlum linklərə daxil olmamağa çağırır, rəsmi və etibarlı məlumatların yalnız “mygov” platformasının rəsmi kanalları vasitəsilə əldə edilməli olduğunu vurğulayır.