Regional məsələlər komitəsi payız sessiyasında 20 qanun layihəsinə baxıb - Komitə sədri

 Milli Məclisinin Regional məsələlər komitəsi 2025-ci ilin payız sessiyası dövründə 7 iclas keçirib və ümumilikdə 22 məsələni müzakirə edib. Bunu komitə sədri Siyavuş Novruzov bildirib.

Müzakirə olunan qanun layihələrindən 20-si Milli Məclisin plenar iclasına tövsiyə edilib və parlament tərəfindən qəbul olunub.

Sessiya dövründə komitədə “Ərazi quruluşu və inzibati ərazi bölgüsü haqqında”, Əmək, Cinayət, Vergi və Cəzaların İcrası məcəllələrinə dəyişikliklər, sosial sığorta, məşğulluq, bələdiyyələrin statusu, əlilliyi olan şəxslərin hüquqları, gender bərabərliyi, ünvanlı dövlət sosial yardımı və digər sosial-iqtisadi sahələri əhatə edən qanun layihələri müzakirə edilib.

Hesabat dövründə Regional məsələlər komitəsinin üzvləri tərəfindən vətəndaşların müraciətləri də nəzərdən keçirilib. Komitənin elektron ünvanına 46, kağız daşıyıcıda isə 214 müraciət daxil olub. Ümumilikdə 1267 müraciət baxılıb, onların bir hissəsinin icrası təmin edilib, digər qismi aidiyyəti dövlət qurumlarına göndərilib və qanunvericiliyin tələblərinə uyğun olmayan müraciətlərlə bağlı vətəndaşlara izahat verilib.

Gülnar Nazimqızı