Deputat qanunların icrasına sistemli monitorinq mexanizminin yaradılmasını təklif edib

Milli Məclisin deputatı Vasif Qafarlı komitələrin səlahiyyətlərinə aid qəbul edilmiş qanunların icra vəziyyətinin planlı və sistemli əsaslarla monitorinq edilməsini təklif edib.

Deputatın sözlərinə görə, bu məqsədlə müvafiq icraedici orqanlardan illik və ya yarımillik dövriliklə hesabatların alınması, monitorinq nəticələrinin komitə iclaslarında müzakirə olunması və zərurət yarandıqda normativ-hüquqi aktlara dəyişiklik təşəbbüslərinin irəli sürülməsi məqsədəuyğundur.

Qafarlı bildirib ki, qanunların real icra vəziyyətinin mütəmadi izlənilməsi qanunvericilik fəaliyyətinin praktiki səmərəliliyini artıracaq, icra prosesində yaranan institusional və normativ boşluqların vaxtında müəyyən edilməsinə imkan verəcək.

Deputat əlavə edib ki, bu yanaşma qanunverici və icraedici hakimiyyət orqanları arasında hesabatlılığı və koordinasiyanı gücləndirəcək, hüquqi tənzimləmənin isə real ictimai ehtiyaclara uyğunlaşdırılmasına xidmət edəcək.

Gülnar Nazimqızı