Deyirlər yaxşı olacaq. Nə vaxt? - Tağıyevdən irad

Şəhər Bələdiyyələrinin Milli Assosiasiyasının sədri Təmraz Tağıyev sahibsiz itlər və yaşıllıqların idarə olunması sahəsində vəziyyəti  tənqid edib, mövcud mexanizmlərin faktiki olaraq işləmədiyini bildirib. Bu barədə Tağıyev Milli Məclisdə regionala məsələlər komitəsində çıxışı zamanı deyib. 

Tağıyev deyib ki, Toplan idarəsinin rəhbərliyində dəyişiklik edilsə də, qurumdan verilən “yaxşı olacaq” vədləri reallıqda nəticə vermir.

“Deyirlər yaxşı olacaq. Nə vaxt? Küçələrdə itlər sürü ilə gəzir, uşaqları, qadınları dişləyirlər", - o bildirib. 

Onun sözlərinə görə, sahibsiz itlərlə bağlı müraciətlər kütləvidir, lakin yerli idarəetmə səviyyəsində real icra mexanizmi mövcud deyil. Bu vəziyyətin ictimai təhlükəsizlik riskinə çevrildiyi vurğulanıb.

Tağıyev ağacların kəsilməsi məsələsində də sistemli problemlərin olduğunu bildirib. Qeyd edib ki, təhlükə yaradan və ya qurumuş ağacların kəsilməsi üçün aidiyyəti qurumlar “növbə” bəhanəsi ilə prosesi uzadır.

“Maşın da veririk, alət də. Yenə eyni cavab – növbə əsasında. Bizə bu növbə nə vaxt çatacaq?”, - 0 əlavə edib. 

Assosiasiya sədri vurğulayıb ki,  problemi həll etmək üçün xarici təcrübəyə əsaslanan yeni mexanizm tətbiq olunub. Onun sözlərinə görə, park və yaşıllıq sahələrində ağaclara QR kod sistemi quraşdırılıb.

“Bu proses başa çatdıqdan sonra hər bir ağac haqqında məlumat QR kod vasitəsilə açıq şəkildə əldə olunacaq", - sədr əlavə edib. 

Tağıyev vurğulayıb ki, mövcud vəziyyət bələdiyyələrin səlahiyyətləri ilə icraedici qurumların məsuliyyəti arasında ciddi boşluqlar olduğunu göstərir və bu boşluqlar aradan qaldırılmasa, problemlər daha da dərinləşəcək.

Gülnar Nazimqızı