Apple iPhone 18 buraxmağa hazırlaşır

 Apple iPhone 18 smartfonları üzrə erkən prototipləşdirmə mərhələsinə başlayıb. Bu barədə GizmoChina portalı tanınmış insayder Digital Chat Stationa istinadən xəbər verib.

Məlumata görə, şirkət dizaynda radikal dəyişikliklər planlaşdırmır və əsas diqqəti ekran ölçülərinin yenilənməsinə, həmçinin baza modellərlə Pro versiyalar arasında funksional fərqlərin gücləndirilməsinə yönəldir.

Standart iPhone 18-in 6,27 düymlük, 120 Hz yenilənmə tezlikli LTPO OLED ekranla təchiz ediləcəyi və Dynamic Island dizaynını qoruyacağı gözlənilir. Oxşar ön panel dizaynı digər baza və büdcə modellərində də tətbiq oluna bilər.

Mənbənin məlumatına görə, iPhone Air 2 modeli 6,55 düymlük, 120 Hz dəstəkli LTPO ekranla təqdim olunacaq və ekran elementlərinin yerləşdirilməsi dəyişməyəcək.

Ən ciddi yeniliklər isə Pro versiyalarda gözlənilir. iPhone 18 Pro və iPhone 18 Pro Max modelləri müvafiq olaraq 6,27 və 6,86 düymlük ekranlarla sınaqdan keçirilir.

Apple Face ID sisteminin bir hissəsini ekran altına keçirməyi nəzərdən keçirə bilər ki, bu da Dynamic Island sahəsinin kiçilməsinə səbəb olacaq.

Mənbə həmçinin bildirir ki, Apple buraxılış qrafikini dəyişməyi nəzərdən keçirir.

 iPhone 18 Pro modelləri 2026-cı ilin sonlarında, baza versiyalar isə 2027-ci ilin yazında təqdim oluna bilər.

N.Təbrizli