Naxçıvanda qarlı hava ilə bağlı sürücülərə və piyadalara xəbərdarlıq edilib

Naxçıvan Muxtar Respublikası Daxili İşlər Nazirliyinin Dövlət Yol Polisi İdarəsi muxtar respublikada hökm sürən qarlı, şaxtalı və qeyri-sabit hava şəraiti ilə əlaqədar sürücü və piyadalara müraciət edib.

Nazirliyin mətbuat xidmətindən AZƏRTAC-ın bölgə müxbirinə bildirilib ki, mövcud hava şəraiti yollarda sürüşmə və yol-nəqliyyat hadisələrinin başvermə riskini artırır. Bu səbəbdən sürücülərə mövsümi şinlərdən, zəncirlə təchiz olunmuş təkərlərdən və texniki cəhətdən saz avtomobillərdən istifadə tövsiyə olunur.

Müraciətdə qeyd olunub ki, sürət həddi seçilərkən hava və yolun vəziyyəti nəzərə alınmalı, xüsusilə enişli-yoxuşlu sahələrdə diqqət artırılmalı, əyləc sistemindən mümkün qədər az istifadə edilməlidir. Avtomobili hərəkətə gətirərkən və sürəti dəyişərkən sürətlər qutusunun imkanlarından yararlanmaq, eləcə də yaxın vuran işıqlardan istifadə etmək tövsiyə edilir. Hava şəraitindən asılı olmayaraq, dövlət nömrə nişanlarının təmiz saxlanılması və aydın görünməsi təmin edilməlidir.
Piyadalara isə yollarda sürüşmə ehtimalı nəzərə alınaraq hərəkət hissəsinə çıxmamaq, yalnız onlar üçün nəzərdə tutulmuş yerlərdən keçmək, səkilərdən, yeraltı və yerüstü keçidlərdən istifadə etmək tövsiyə olunur.