“28 May”–“Cəfər Cabbarlı” stansiyaları arasında əlavə piyada tunelinin inşasına başlanılıb

Bakı metrosunun “28 May” və “Cəfər Cabbarlı” stansiyaları arasında əlavə piyada tunelinin inşasına start verilib.

“Bakı Metropoliteni” QSC-nin mətbuat katibi Bəxtiyar Məmmədovun “Report”a bildirdiyinə görə, mövcud piyada keçidinin analoji nümunəsi platformanın digər tərəfində də inşa olunacaq. Hazırda tunelin qazıntı işləri aparılır.

Qeyd olunub ki, yeni keçid sərnişin axınının daha rahat və təhlükəsiz təşkili məqsədi daşıyır və metronun xətlərinin ayrılması layihəsinin tərkib hissəsidir.

Mətbuat katibi bildirib ki, “28 May” və “Cəfər Cabbarlı” stansiyaları arasında xətlərin fiziki ayrılması layihəsi üzrə növbəti mərhələyə başlanılıb. Hər iki stansiya yaxınlığında yerləşən hazırlıq şaxtalarında işlər tamamlanıb və tunel səviyyəsinə enilib.

Layihə çərçivəsində işlər ərazinin geoloji xüsusiyyətləri nəzərə alınmaqla xüsusi inşaat qaydaları əsasında həyata keçiriləcək və təhlükəsizlik baxımından etibarlı üsullar tətbiq olunacaq.

Məlumata görə, xətlərin fiziki ayrılması prosesinin ümumilikdə 11 ay davam etməsi planlaşdırılır.