Ermənistanla məhkum mübadiləsi mövzusunda dövlət siyasəti cəmiyyətə düzgün izah olunmalıdır - Deputat

Azərbaycanın Ermənistana təhvil verdiyi 4 məhkumla bağlı məsələ bəzi xarici dairələrdən maliyyələşən qruplar tərəfindən ölkə əleyhinə informasiya kampaniyasında istifadə olunub. Bunu Milli Məclisin deputatı Azay Quliyev deyib.

Onun sözlərinə görə, sözügedən proses həssas xarakter daşısa da, aparılan dövlət siyasətinin mahiyyəti ictimaiyyətə düzgün və balanslı formada çatdırılmalıdır.

“Bu ideanın necə manipulyasiya edildiyini və Azərbaycanın əleyhinə istifadə olunduğunu gördük. Mövzu həssas idi, başa düşürəm ki, hər detal açıqlana bilməzdi. Amma bu cür qərarları elə təqdim etməliyik ki, yanlış interpretasiyalara imkan yaranmasın”, – Quliyev bildirib.

Deputat vurğulayıb ki, belə hallarda vətəndaş cəmiyyəti institutları ilə sistemli və düzgün kommunikasiya qurulması vacibdir. Onun fikrincə, informasiya boşluğu xarici təsir imkanlarını artırır və bu da dövlət maraqlarına zidd nəticələrə səbəb ola bilər.

Yanvarın 14-də Azərbaycan və Ermənistan arasında əldə olunmuş ikitərəfli razılığa uyğun olaraq Azərbaycan Respublikasının Cinayət Məcəlləsinin müxtəlif maddələri ilə təqsirli bilinərək ölkəmizdə cəza çəkən Vaqif Xaçatryan, Gevorq Sujyan, David Davtyan və Vigen Eulcekyan Ermənistana təhvil verilib.

Gülnar Nazimqızı