“Classnet” MMC internet xidmətinin uçota alınmaması səbəbindən 1,5 min manat cərimələndi

Azərbaycanda internet telekommunikasiya xidməti göstərən operator və provayderlər xidmət göstərməyə başladıqları vaxtdan 15 gün ərzində uçota durmalıdır.

İnformasiya Kommunikasiya Texnologiyaları Agentliyindən (İKTA) bildirilib ki, “Classnet” MMC bu tələbi vaxtında yerinə yetirməyib. Bunun nəticəsi olaraq, Azərbaycan Respublikasının İnzibati Xətalar Məcəlləsinin 370-1.0.1-ci maddəsinə əsasən inzibati xəta protokolu tərtib olunub və Bakı şəhəri Səbail Rayon Məhkəməsinə göndərilib.

Məhkəmənin qərarına əsasən, “Classnet” MMC 1.500 manat məbləğində cərimə olunub.

Qeyd olunur ki, ölkədə internet operatorlarının vaxtında uçota durması qanunvericiliklə tənzimlənir və bu, telekommunikasiya xidmətlərinin şəffaflığını təmin etmək məqsədi daşıyır.