“Dərnəgül” deposunun inşası bərpa olunub - AYNA sədri

“Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı” çərçivəsində Bakı metrosunda 10 yeni stansiyanın tikintisi nəzərdə tutulur və bu, metro tarixində qısa müddətdə reallaşdırılması planlaşdırılan ən iri genişlənmə mərhələlərindən biri olacaq. Stansiyalardan birinin 2026-cı ildə istismara verilməsi planlaşdırılır.

Bu barədə Azərbaycan Yerüstü Nəqliyyat Agentliyinin (AYNA) İdarə Heyətinin sədri Anar Rzayev Dövlət Proqramının 2025-ci il üzrə icrasına həsr olunmuş dəyirmi masada bildirib.

Rzayevin sözlərinə görə, uzun fasilədən sonra “Dərnəgül” elektrik deposunun inşası davam etdirilib. Paralel olaraq, “28 May” stansiyası ərazisində xətlərin ayrılması layihəsi çərçivəsində iki nöqtədə şaxtaların qazıntısına başlanılıb.

O əlavə edib ki, “İçərişəhər” stansiyasından sonra dönmə kamerasının inşası üçün aidiyyəti qurumlarla kommunikasiyalar dəqiqləşdirilib və sahə tikinti işlərinə hazır vəziyyətə gətirilib. “Həzi Aslanov” stansiyasının dalan yolunda isə yenidənqurma işləri növbəti mərhələyə çatdırılıb.

AYNA rəhbəri həmçinin qeyd edib ki, B4 layihə adlı stansiyada ötən il ərzində təmir və tikinti işləri sürətlə davam etdirilib.

2025–2030-cu illəri əhatə edən Dövlət Proqramı Bakı və Abşeron üzrə metro infrastrukturunun genişləndirilməsi, xətlərin ayrılması ilə buraxılış qabiliyyətinin artırılması və operativliyin yüksəldilməsini hədəfləyir. Rəsmi açıqlamalara görə, yeni stansiyalar və depo layihələri sərnişin axınının optimallaşdırılması, pik saatlarda sıxlığın azaldılması və şəhərdaxili mobilliyin artırılması məqsədi daşıyır.

Aytac Zeynalova