Bakı hava limanında saxta pasportla Almaniyaya uçmaq istəyən şəxs həbs edilib

Heydər Əliyev Beynəlxalq Hava Limanında saxta pasportdan istifadə edərək Almaniyaya getməyə cəhd edən 1985-ci il təvəllüdlü Əlcəzair vətəndaşı Keddau Abdelhamid saxlanılıb.

Məlumata görə, o, ilkin sərhəd nəzarətindən keçərkən Türkiyəyə uçacağını bildirərək özünə məxsus Əlcəzair pasportunu təqdim edib. Daha sonra gözləmə zalında Bakı–Frankfurt reysi üçün qeydiyyatın aparıldığını görən şəxs onlayn şəkildə saxta Belçika pasportu ilə bilet alaraq minik qapısına yaxınlaşıb.

Aviaşirkət əməkdaşı təqdim edilən pasportda Azərbaycan Dövlət Sərhəd Xidmətinə məxsus giriş-çıxış ştamplarının olmadığını aşkar edib və bu barədə aidiyyəti qurumlara məlumat verib.

Araşdırma zamanı müəyyən edilib ki, saxta pasport Belçikadan 2000 avro qarşılığında alınıb. Məhkəmənin qərarı ilə Abdelhamid Azərbaycanda 7 ay müddətinə azadlıqdan məhrum edilib.